فاكرين الريس حنفي والسفينة نورماندي .. نورماندى تووووووووو .. أول ما حرم الريس حنفى المصون اعطت إشارة الانطلاق لنورماندي غرقت فى شبر ميه .. ونزلت ومطلعتش .. مش عارف ليه افتكرت الحكاية دى وأنا بتابع أخبار سفينة الشحن المصرية اللى اختفت فى البحر الاحمر من شهر يناير اللى فات ومحدش عارف هى راحت فين ..وبدأت الشركة الملاحية التابع لها السفينة بالتعاون مع مركز البحث التابع للقوات المسلحة المصرية فى تمشيط البحر الاحمر .. وبرده مفيش فايدة .. لا وجدوها عائمة ولا وجدوها غارقة فى البحر .. الشىء المحزن فى الحكاية كلها هم اهالى الناس اللى كانوا على متن السفينة دى .. لا هم عارفين اهاليهم احياء ولا اموات ولا أى حاجه ..
والاغرب أن مساحة البحر الاحمر مش كبيرة علشان ممكن حاجه زى دى تختفى ومحدش يعرف هى راحت فين ..
القضية دى كلها عجيبة فى حاجة واحدة بس ..أن دولة تختفى داخلها حاجه ومش عارفه توصل لها .. وبعدين الحاجة دى مثلا ايه مش كيس جوافة ولا برتقال .. دى مركبة شحن ..وزى ما قال النائب ده بتاع مجلس الشعب اللى انا مش فاكر اسمه ، قالهم ( هو ايه ..اللى اختفت دى فى البحر الاحمر إبره مش عارفين تلاقوها ..)
فبجد حاجه غريبة ..
يعنى انتوا فاكرين زمان لما كان صدام حسين عامل وش فى ودان اللى متتسماش أمريكا .. طلع وزير خارجية أمريكا وقتها وقال يعنى هو صدام حسين فاكر انه بعيد عن عنينا ولا احنا ولا مؤاخذة مش عارفين هو بيعمل ايه ، ده احنا عارفين لون الملابس الداخلية بتاعة صدام حسين ..
كده بكل وقاحة بيتفاخروا انهم بيعرفوا دبة النملة على الارض بالاقمار الصناعية بتاعتهم ، وبعدين مش على ارضهم بس ده على مستوى الكرة الارضية .. وبغض النظر عن كلام الامريكان إذا كانوا بينخعوا ولا كلامهم حقيقى .. إلا ان موقفنا احنا مش لاقى تعبير اقوله غير (( عيب)) .. عيب لما يكون ناس زى دول بيقولوا بيعرفوا دبة النملة واحنا مش عارفين نجيب سفينة اختفت داخل الحدود المصرية ..
وبعدين تحس فى طريقة تعامل الناس مع قضية اختفاء السفينة دى بطريقة عادية .. يعنى عادى ماشى الحال .. وأنا شايف حقيقى ان القضية كلها فيها جانبين مهمين مش لازم نيصهين عليهم .. الجانب الاول يا اخوانا هو الجانب الانساني ، يعنى لما تلاقى ابن قائد السفينة دى مش عارف اى حاجه عن ابوه لمده شهرين أو أكتر حبتين .. ويروح لده.. وده يرميه على ده.. وده يقوله فوت علينا بكره.. واللى يقوله جملة (اسماعيل يس) المشهورة فى مشاغبة الشاويش عطية ( والله يا بنى منا شايف) ..
فتحس أنك بتتعاطف مع الابن ده اللى بيدور على ابوه ومحدش إداله كلمتين تفيده فى العملية دي .. الجانب التاني واللى أنا إتكلمت عليه من شويتين أن عيب احنا دولة كبيرة مش هافية يعنى .. مش عارفين نجيب سفينة شحن اختفت داخل حدودنا.. ازاى !
انتوا فاكرين الطيارة بتاعة التجسس اللى بعتتها امريكا على كوريا .. لكن الكوريين عكشوا الليلة ووقعوا الطيارة دى وجننوا الامريكان عليها وذلوهم .. الكوريين شغالين الله ينور ، واحنا بس مسكنهم مسخرة هما وبتوع الصين .. ودى طيارة تجسس ومع ذلك انكشفت لما دخلت حدود كوريا ..يعنى مش طيارة شحن ولا محملة بفساتين سوارية لستات كوريا ولا أى حاجه ...
فيا اخونا دلوقت عاوزين السادة الاعضاء يتبرعوا ويقدموا إقتراحات لشركة الملاحة ازاى ممكن نلاقى السفينة دي .. يمكن ربنا يفتحها عليهم وإقتراح من بتوعك يضرب ويلاقوها ..
أنا حبدأ فى الاقتراحات ، وحقدم لشركة الملاحة إقتراحين ..
الاول : الاستعانة بالريس حنفى وحرمه المصون فى البحث عن السفينة لما لهم من سابق خبرة فى انتشال النورماندى ..ومش اى نورماندى .. دى نورماندى تووووووووووووو
الثاني : تأجير مركب من بتوع الصيادين ونأجر واحد على المركب دى برابابة ويلف ويمسح البحر الاحمر وينادى على أسماء المفقودين .. يمكن واحد فيهم يكون فاقد الذاكرة يرد ولا حاجه .
موضوع: ســـيــــري يا نـــورمـــــاندي 
الخميس مارس 13, 2008 7:42 pm
